Chie semus
Comune de Thiniscole
Ente titulare
Ceas de Santa Luchia
Ente gestore
Iscuadra
Semus duas professionistas de s’educatzione ambientale chi, dae su 2007, cun passione e determinu, amus fatu programmas in sas iscolas de cada òrdine e gradu, istudiadu e monitoradu su sistema costeri de sas dunas de Capu Cuminu, progetadu itineràrios escursionìsticos e aprontadu eventos pro cumpartzire sa cultura de su gosu dèghidu de sos logos. De prus, semus a tretu de ammaniare eventos, mustras, escursiones istòricu-naturalistas, bìsitas ghiadas in gruta e campos iscola.
Connoschèntzia e formatzione
Mai satzas de connoschèntzia e de formatzione conca a prus noas e profetosas medidas de comunicatzione, s’esperièntzia nostra in su tempus nche l’amus giuta finamentas a foras de s’ìsula e de s’Itàlia.
Su 2018 amus bìnchidu una bursa de istùdiu cun Erasmus PLUS, cosa chi nos at permìtidu de sighire unu cursu de educatzione ambientale in Grètzia aprofundende sa chistione de sos refudos marinos. Esperièntzia prus chi non formativa in ue nos semus cunfrontadas cun educadores de cue, de Tzipru e de Malta.
Su 2022, imbetzes, amus pigadu parte a unu cursu in Bartzellona in contu de formatzione in abertinu, semper cun contributu Erasmus PLUS.
Reconnoschimentos
Pro s’atividade acumprida su 2009 amus retzidu s’acreditamentu dae sa Regione Sardigna in su sistema SIQUAS (Sistemi Qualità Sardegna). Acreditamentu chi sa Regione nos at torradu a dare su 2017 pro àteros chimbe annos (Det. n. 1557 rep. n. 12 de su 26/01/2017)
Su CEAS est in rete cun totu sos àteros tzentros de sa Sardigna. Dae su 2017 semus parte de s’Ufìtziu Riserva de Biosfera “Tepilora, Rio Posada e Montalbo” in pare cun totu sos àteros Ceas de su logu.
IN.F.E.A.S.
Semus parte de su Sistema IN.F.E.A.S. (INformazione, Formazione ed Educazione Ambientale Sardegna) chi est un’organizatzione a rete pro pesare e ispainare sa cultura de unu modellu de sotziedade sustenìbile e responsàbile. Punna printzipale est sa de promòvere e organizare progetos e programmas dedicados a s’educatzione e a sa sustenibilidade ambientale.
Sa funtzione de su laboratòriu est indiritzada mescamente a sa didàtica de àmbitu iscolàsticu cun sa punna cuntzetuale chi movet dae unu sentidu de apartenèntzia a sa natura.
Rete IN.F.E.A.S.
Su sistema regionale est un’organizatzione a rete chi favoressit s’acumprimentu de punnas cumpartzidas de educatzione ambientale e a sa sustenibilidade pro mèdiu de atziones e fainas isvilupadas collaborende cun amministratziones, entes, organismos, assòtzios chi òperant in su setore.
Sos tzentros de educatzione ambientale e a sa sustenibilidade (CEAS) sunt istruturas de servìtziu territoriales e multifuntzionales. Sa Regione ponet a sistema sos chi sunt presentes in sos logos aprontende una rete istratègica pro sa crèschida de custa cultura in Sardigna.
A su presente sos CEAS non sunt sos printzipales osservadores de sos sistemas ambientales locales ebbia, ma finamentas puntos de riferimentu pro s’animatzione e sa partetzipatzione de sos tzitadinos e de sas impresas e ativadores de pràticas bonas e de interventos dèghidos cunforma a sas punnas issoro.
Sos Ceas sunt istruturas de natura pùblica sende chi faghent riferimentu a unu Comunu o a un’Ente parcu (sugetu titulare) cun una gestione de natura privada (ente gestore).
A como faghent parte de sa rete sos CEAS acreditados e tzertificados dae sa Regione Sardigna, ma fintzas sos chi galu no lu sunt.
Galleria
